Internasionale Verslag – 26 Junie 2020

Friday | 26 June | 2020

Vandag se verslag sal die laaste daaglikse verslag oor die koronapandemie wees. Van volgende week af sal ek twee keer per week ‘n internasionale verslag oor alle internasionale nuus van belang opstel en versprei en natuurlik sal die koronapandemie nog vir lank deel van die nuwe internasionale verslag uitmaak.

 

Hier is vandag se nuusbrokkies oor die koronapandemie en sy gevolge regoor die wêreld:

1. Die getal nuwe werkloosheidsaansoeke wat verlede week in die VSA ingedien is, was steeds 1,48 miljoen wat meer is as waarvoor gehoop is. Sowat 19,5 miljoen Amerikaners het steeds verlede week werkloosheidsvoordele ontvang en nadat aansoeke vir voordele in Mei skerp afgeneem het, het dit nou in die eerste drie weke van Junie op hierdie hoë vlak begin stabiliseer. Dit veroorsaak kommer oor die hersteltempo van die Amerikaanse ekonomie en nadat baie ekonome enkele weke gelede nog ‘n vinnige herstel verwag het, begin die hoop daarvoor nou vervaag.

 

2. Die getal nuwe bevestigde gevalle van persone met COVID-19 in die VSA was gister 39 818 wat die meeste nuwe gevalle nog op een dag in dié land is. Daar is steeds ‘n skerp toename in gevalle in Texas, Alabama, Arizona, Kalifornië, Florida, Idaho, Mississippi, Missouri, Nevada, Oklahoma, Suid-Carolina en Wyoming. Meer as 2,5 miljoen Amerikaners het reeds positief vir die virus getoets. Die Amerikaanse Sentrum vir Siektebeheer en -Voorkoming beraam egter dat slegs ongeveer 1 uit elke 10 COVID-19-gevalle in die land reeds geïdentifiseer is en dat meer as 20 miljoen Amerikaners inderwaarheid reeds COVID-19 opgedoen het. Intussen het die deelstaat met die tweede grootste bevolking, Texas, Donderdag heropeningsplanne vir eers uitgestel aangesien nuwe gevalle van die koronavirus en hospitalisasies skerp toegeneem het.

 

3. Bykans 1,1 miljoen koronavirus-vergoedingsbetalings van altesaam 1,4 miljard dollar is aan dooie mense uitbetaal. Die Aanspreeklikheidskantoor van die federale regering het gister dié bevinding bekend gemaak. Die Amerikaanse kongres het in Maart besluit om ‘n eenmalige betaling aan elke Amerikaanse burger te maak as deel van die koronavirus-hulppakket. Dit is nog onseker of die regering daarin gaan slaag om die meeste van die foutiewe betalings aan persone wat reeds beswyk het, terug te kry.

 

4. Nguyen Xuan Phuc, die Eerste Minister van Vietnam, het gister tydens ‘n beraad van die staatshoofde van lande in Suid-Oos-Asië gesê dat die pandemie besig is om al die vordering wat met ekonomiese groei en armoedeverligting oor die afgelope dekade in Suid-Oos-Asië gemaak is, uit te wis. Volgens hom gaan miljoene mense in dié streek vanjaar weer in absolute armoede gedompel word.

 

5. Ten spyte daarvan dat Pakistan die vyfde grootste bevolking in die wêreld het, het dié land se kapasiteit om mense vir die koronavirus te toets die afgelope week eerder agteruit gegaan. Slegs 21 041 mense is Donderdag in Pakistan getoets, terwyl die Wêreldgesondheidsorganisasie sê dat Pakistan ten minste 50 000 mense per dag moet toets. Tot dusver het byna 200 000 mense in Pakistan positief vir die virus getoets, maar daar word algemeen aanvaar dat baie meer mense reeds die virus opgedoen het.

 

6. Nuwe gevalle neem ook daagliks in Indië toe met 17 296 nuwe gevalle wat gister aangemeld is. Sowat 500 000 mense is tot dusver positief vir die koronavirus in Indië getoets met die sterftesyfer wat tot meer as 15 000 gestyg het.

 

7. Mexiko het ook gister ‘n nuwe rekord van persone wat positief vir die koronavirus getoets het, aangemeld. Meer as 200 000 mense in dié land het nou reeds positief getoets en meer as 25 000 sterftes is aangemeld.

 

8. Die Nederlandse regering het bekend gemaak dat ‘n reddingsboei van 3,4 miljard Euro aan die KLM-lugdiens beskikbaar gestel word. Die ondersteuningspakket bestaan ​​uit ‘n lening van 1 miljard Euro en waarborge vir banklenings van 2,4 miljard Euro. KLM het tans 30 000 werknemers, maar die hulppakket sal steeds nie alle afleggings voorkom nie en duisende mense gaan steeds hulle werk by KLM verloor. Volgens die ooreenkoms tussen die Nederlandse regering en KLM moet die lugdiens sy koste met 15% sny en moet die aantal nagvlugte vanaf die Schiphol-lughawe in Amsterdam verminder word. Nagvlugte is reeds vir jare ‘n strydpunt in Nederland omdat die geraas van vliegtuie wat opstyg en land in dié digbevolkte land ‘n probleem bly. Intussen is bekend gemaak dat die Amerikaanse private beleggingsmaatskappy, Bain Capital, beheer oor nog ‘n sukkelende lugdiens, Virgin Australia, bekom het.Die lugredery het onlangs om bankrotskap aansoek gedoen.

 

9. Die Amerikaanse sportgoedere-maatskappy Nike het bekend gemaak dat dié maatskappy ‘n verlies van 790 miljoen dollar in die drie maande wat op 31 Mei geëindig het, gely het. Die maatskappy se inkomste het met 38% gedaal. Sowat 90% van sy winkels in Noord-Amerika, Latyns-Amerika en Europa was tydens dié drie maande gesluit en internetverkope kon nie vir die verlies in verkope by winkels opmaak nie.

 

10. Die Wêreldgesondheidsorganisasie het sy kommer uitgespreek dat die voorkoms van die koronavirus in dertig Europese lande besig is om toe te neem. Die situasie is volgens dié organisasie se hoof vir Europa veral kritiek in elf lande waar daar oor die afgelope twee weke ‘n skerp toename in die infeksiesyfer was. Die elf lande is Armenië, Swede, Moldowa, Noord-Masedonië, Azerbeidjan, Kasakstan, Albanië, Bosnië en Herzegowina, Kirgistan, Oekraïne en Kosovo.

* Alle inligting was ten tyde van publikasie korrek.