Onluste, plundering en veiligheidskwessies rapporteringslyn: 012 880 1979 |
Beskikbaar: Ma. – Do. 08:00-16:30, Vry. 08:00-15:00

Ons is gewone mense wat reg is om te werk en 'n reg het om te werk.

Ons oproep op die regering is om almal wat gesond kan werk, toe te laat om te werk. Ons kies nie tussen gesondheid en werk nie, maar vir gesonde werk.

Suid-Afrika verkeer in 'n ramptoestand, deels as gevolg van 'n virus wat die wêreld getref het en deels as gevolg van irrasionale inperkings wat die ekonomie en werk vernietig. Suid-Afrika is egter nie 'n diktatorskap waar daar op bevele van 'n bevelsraad gewag moet word nie. Ons gewone mense wat wil werk, het 'n stem wat gehoor moet word.

Ons sien hoe die ekonomie en ons werk vernietig word en ons gaan nie net terugsit en wag nie. Wêreldwyd keer werkers terug werk toe. Lande het metodes gevind om gesond te werk. In verskeie lande is mense al vir etlike weke terug by die werk en is daar al bewys dat werkplekke wat die nodige voorsorgmaatreëls tref, veilige en gesonde werkplekke kan wees waar die koronavirus nie oorgedra word nie. Ons eis ons reg op om in ons eie land gesond te kan werk. Die regering kan nie tussen ons en ons werk staan nie.

Die inperking kan die bruto binnelandse produk met 23% laat krimp. Die werkloosheidsyfer kan tot 50% styg. Volgens Statistieke Suid-Afrika gaan 36,8% van ondernemings met 'n omset van groter as R2 miljoen hul werksmag sny en 30,6% sal waarskynlik hul deure sluit. Die voortgesette inperking gaan lei tot katastrofiese ekonomiese gevolge, werksverliese, hongersnood en lewensverlies. Sterftes kan tot 29 keer meer wees as gevolg van die ekonomiese krisis as wat die geval weens die virus is.

Vir ander is dit statistieke; vir ons is dit ons inkomste, en ons vermoë om vir ons gesinne te sorg. Vir die regering is dit 'n regulasie; vir ons is dit 'n ramp wat alle mense in Suid-Afrika gaan raak.

Ons doen 'n beroep op die president om Suid-Afrika se strategie om die Covid-19-pandemie te bestuur, te wysig. Skep veilige werkplekke deur werkgewers te dwing om aan streng vereistes te voldoen, maar hou op om die meeste werkers weg van hul werkplekke en inkomste te hou. Ondernemings en werkgewers wat aan hierdie vereistes vir ’n gesonde werkplek kan voldoen, moet kan oopmaak en ons wat gesond kan werk, moet werk.

Ons staan op vir ons reg om gesond te werk. Geen regulasie mag ons keer nie.

#RegVirWerk
Checkboxes
Checkboxes

Korona Registrasie

Registreer

BV *
Klik hier vir Bepalings en voorwaardes

Korona Registrasie

Registreer

BV *
Klik hier vir Bepalings en voorwaardes